PITUAH MANDEH (Oleh-oleh dunsanak dati Kampung..)

Elok elok anak dirantau,
Lauik SATI rantau BATUAH,
Usah lupo pai KASURAU,
Barasaki jan lupo basidakah

Rantangkan tali kapangabek
Jalin kulindan diateh bumi,
Hubungan jo ALLAH dipaarek
Parapek pulo samo insani
rumah gadang

Hilia kabukik rimbo panjang,
Tikuluak nan usah ditanggai,
Usah paturuik an hati gadang,
Isuak nyo badan disasa i

Kalilah banda tanamlah lantak                                  
Nak lalu aia kamuaro,
Awal dikana akhia indak,
Alamaik kajadi sio sio

Dek ameh sagalo kameh,
Dek padi sagalo  jadi,
Usah anak bamaleh maleh,
Rajin rajin anak mancari

Kok lai rasaki banyak'
saketek paralu disimpan juo,
Kanalah badan katalatak,
Ingeklah nantik awak ka tuo

Usah maminum sadaguik abih,
Mamakan usah sakulek hilang,
Bahemat hemat jikok bapitih,
Balanjo nan usah gadang2

Tangguak rapek karuntuang jarang,
Dimanolah ikan katabao,
Gaji ketek balanjo gadang,
Alamat badan kasansaro

Kawan galak mudah dicari,
Kawan manangih jarang basuo,
Galak tabahak dimeja judi,
Manangih surang dipanjaro

Usah main bahuru huru,
Pai malala kian kamari,
Pandai pandailah mambagi waktu
Baiak siang jo malam hari

Jikok singgah dikadai kopi,
Minumlah kopi gak samangkuak
Jauah i wisky jo brendy,
mambuek teler sarato mabuak

Kurai taji pakan sinayan,
Urang manjua lado mudo,
Capek kaki ringan tangan,
Namun salero kalapeh juo

Capek kaki usah panaruang
Capek tangan usah manyambo
Kadalam tansi lalok baguluang
Sasa tumbuah ndak ado guno

Jiko anak pai ka lapau,
hiu bali balanak bali,
Ikan panjang bali dahulu,
Jikok anak pai marantau,
Ibu cari dunsanak pun cari,
Induak samang cari dahulu

Jikok pandai bakain panjang
Samo sajo bakain saruang,
Jikok pandai bainduak samang
Samo sajo jo mandeh kanduang

Tagaklah anak di nan data ,
Tagak diadat jo aturan
Badirilah anak di nan bana,
Mungkin jo patuik ka ukuran

Kalau sipadan diasak urang,
Nan bana nyo tuka tagak,
Tunjuakkan awak sabagai rang minang,
Usah takuik darah taserak

Darah ayah turun ka anak
Warih dijawek dek kamanakan
Usah mundur walau satapak
Adok i malah sacaro jantan

Kok pai anak ka batawi,
Mancari pitih dirantau urang
Usah sampai tajarek kaki,
Sahinggo lupo jo Ranah minang

Laguah lagah bunyi padati
Padati anak urang kamang mambao patai sarato lado
Bialah sapiriang dapek pagi
Walau sasuok dapek patang
Jan lah sampai baputuih aso

Ijuak kok nyato jd tali,
Anau dirimbo kanalah juo,
Isuak ko ado lai rasaki,
Usah lupo sanak sudaro

Bialah luluah padi di balam,
Namun dadak baniahkan juo,
Bialah rusuah hati didalam,
Namun galak manihkan juo

Bakabuik gunuang talamau,
Hilang ditimpo paneh pagi,
Usah hanyuik buyuang dirantau,
Jalang juo sanak famili

Jikok kaladang buyuang bisuak
Padi nan indak ado lai Namun banto siangi juo
Jikok pulang buyuang bisuak
Kami nan indak ado lai
Namun pusaro jalangi juo

Babuek baiak pado pado
babuek buruak sakali jangan
Jan sampai diri taniayo
Sayang ka urang jajok dibadan

itulah pasan mandeh nan harus dijalankan...
Jan sampai manyasa kamudian...

("Aku Bangga Menjadi urang Minangkabau")

republish from whatsapp group
-----------------------------------------------------------
dibutuhkan donasi perpanjang sewa domain, salurkan ke 3343-01-023572-53-6 (rek bri simpedes) atas nama Atri Yuanda. konfirmasi via whatsapp ke 085362377198. donasi masuk masih nol.semoga menjadi amal jariah

1 orang mendapat hidayah lebih baik dari pada dunia dan isinya, yuk share
kunjungan anda kembali = penyemangat untuk update artikel selalu

PITUAH MANDEH (Oleh-oleh dunsanak dati Kampung..)
-->